Bir neçə gün öncə jurnalist Cavanşir Həsənli sabiq nəqliyyat naziri Ziya Məmmədovun oğlu Anar Məmmədovun Virciniya adalarındakı bir şirkətdə 41 milyon funt sterlinqə (85 milyon manat) sahib olması ilə bağlı məlumat paylaşıb. Həmçinin jurnalist Anar Məmmədovun şirkətinin Britaniyanın şimal-qərbində 22 restorandan ibarət "KFC franchise" şəbəkəsinə sahib olduğunu da iddia edib.
TEREF.AZ xəbər verir ki, sözügedən məsələ ilə bağlı Ziya Məmmədov manset.az-a açıqlama verib. O, yazılanların həqiqətə uyğun olmadığını bildirib:
“O xəbəri yazan kimdirsə, getsin o restoranı tapsın. Sonra o restoranı həmin adama bağışlayacam. Otuz ildir ki, belə cəfəngiyyat şeylər yazırlar, məndən əl çəksinlər. Anarın Britaniyada restoranı yoxdur. Bu cür məlumatlarla mənə qarşı təxribat edirlər. Əgər Allaha inamınız varsa, inanın ki, elə şey yoxdur. Mənim nəyim varsa, aşkardadır. Mən gizlində iş görən deyiləm. Restoran elə bir obyektdir ki, onu gizləmək mümkün deyil. Yalandır, böhtandır. Bir restoranım var, o da kəndimizin başındadır. Gedin, yeyin, için, kef edin. Amma Britaniyada restoranımızın olduğunu kim yazıbsa, ona deyin getsin götürsün. Həmin restoranı ona bağışladım”.
TEREF.AZ yazır ki, Ziya Məmmədovun cavabına araşdırmaçı jurnalist Cavanşir Həsənlinin cavabı gecikmədi. Cavanşçir bəy yazır:
"Allaha inanıram, amma sənədləri hara qoyaq?
Ziya müəllim oğlunun Londondakı restoranını mənə bağışladı. Amma mən bildiyim 23 restorandır. Jurnalist gərək soruşaydı ki, birini bağışlayıb, yoxsa hamısını?
"Britaniyada restoranımızın olduğunu kim yazıbsa, ona deyin getsin götürsün. Həmin restoranı ona bağışladım".
Restoranı almamış əl çəkən deyiləm, söz dildən çıxar)))"