Dövlət Təhlükəsizliyi Xidməti (DTX) tərəfindən saxlanılan şəxsin ölkədə terrora açıq çağırışlar etdiyi, qadağan olunmuş dini kitablar yaydığı müəyyən edilib.

Musavat.com xəbər verir ki, 25 yaşlı Elşən bu təbliğatı sosial şəbəkə hesabında aparıb.

O, DTX əməkdaşları tərəfindən saxlanılıb.

Elşənə qarşı ağır ittihamlar irəli sürülüb. Belə ki, qanunsuz olaraq dini təyinatlı ədəbiyyat satma, yayma, dini ekstremist materialları hazırlama, saxlama, yayma və terrorçuluğa açıq çağırış ittihamları ilə təqsirli bilinib.

İttihama görə, Elşən instaqramda “baqiyah_media” adlı profil açıb. 2020-ci ildən etibarən həmin hesabdan “tək aktor terroru” hesab edilən “yalnız canavar” hücumlarının planlaşdırılması və həyata keçirilməsi qaydalarını açıqlayan “yalnız kurdun el kitabı” adlı kitabı paylaşıb.

2021-ci ildə Bakıda Türkiyə və Azərbaycan silahlı qüvvələrinin birgə keçirilmiş hərbi paradı əks olunmuş videogörüntüyə “Kafirlər tağut yolunda vuruşurlar, elə isə şeytanın dostları ilə vuruşun” məzmunlu paylaşım edib.

Elşənin həmin hesabdan “Biz sizi mübarizəmizdə yeni bir mərhələyə girdiyimiz mövzusunda müjdələyirik”, “Sizə ən əvvəldəki öncələyimiz mövzusunda xatırlatma etmək istəyirəm. O da “Əsirlərin Qurtarılmasıdır”, “Bu mərhələyə “Divarların Dağıdılışı” adını verdiyimiz əməliyyat ilə başlayacağıq”, “Əsirlərimizə zülm edən hakimlər, prokurorlar, sorğu zabitləri və gözətçiləri axtarılanlar siyahısının ən başında qoyun”, “Düşmənlərimizin qalalarını parçalayacağıq” məzmunlu paylaşımlar yayıb.

Əməliyyat zamanı onun yaşadığı evdən 100-dən artıq dini təbliğat vasitəsi hesab edilən kitab aşkar edilərək götürülüb.

Elşən özünü qismən təqsirli bilib və əməlindən peşman olduğunu deyib.

O, sosial şəbəkədə dini məsələlər və dövlət əleyhinə olan paylaşımlar etdiyini etiraf edib.

“Paylaşımları dövlət əleyhinə çağırışlar məqsədi ilə etməmişdim. Sonra bütün paylaşımları sildim. Hər şeyi yanlış dərk edib, dini anlayışımı bu cür təsvir etmişəm. Partlayış törədib insanlara zərər yetirmək niyyətim olmayıb”, - deyə Elşən qeyd edib.

O, dini kitabları satmaq məqsədi ilə gətirmədiyini, həmin kitabların qadağan olunmasından xəbərsiz olduğunu söyləyib.

Məhkəmənin hökmü ilə Elşən 5 il müddətinə azadlıqdan məhrum edilib.