 |
|
|
Tanınmış müğənni Elmira Ələkbərzadə (Emma) məhkəməyə müraciət edəcək. DİA.AZ bildirir ki, o özü bu haqda Moderator.az-a danışıb. Sənətçi bildirib ki, saytlardan biri onun haqda “mədə kiçiltmə əməliyyatı etdirib” deyə xəbər yazıb.
“Saytda yayımlanan məlumatı mənə dünən yolladılar. Baxmayaraq ki, əqrəb bürcüyəm amma o qədər səbrliyəm ki. Tərbiyəm, mədəniyyətim heç vaxt imkan verməyib ki, bu illər ərzində mən hansısa problemə görə məhkəmə işi açım, prokuorluğa müraciət edim. Dünən artıq səbrim daşdı. Öz-özümə dedim ki, belə olmaz. Gecə ikən vəkilim İradə Cavadovaya zəng edib, məsələdən xəbərdar etdim. Saytın adını dedim. Əlbəttə ki, həmin saytdan rəsmi bir insanı tapacaqlar. Mənim üçün fərq etmir, kasıb saytdır yaxud da varlı sayt! Şərə və yalana görə mənə böyük məbləğ ödəyəcəklər. Sizin əlinizdə sübut olmaya-olmaya nə ixtiyarınız var ki, götürüb ağzınıza gələni yazasız. Kim sizə bu ixtiyarı verib? Bu tərbiyəsizlikdən başqa bir şey deyil! Onlar qanun qarşısında cavab verəcəklər” deyə müğənni bildirib.
Sənətçi deyib ki, hələ də onun mədə kiçiltmə əməliyyatı etdirdiyini düşünənlər var.
“Bilirsiniz bədbəxtçilik nədədir? Bilən də, bilməyən də rəy yazır. Mən ümumiyyətlə saytın sonunda yazılan rəyləri oxumuram, çünki özümü sevən insanam. Bəzi kütlə var ki, bisavaddılar. Bizim mədə kiçiltmə cərrahlarının bəziləri ilə efirlərə çıxmışam, hörmətim var onlara. Hətta onlar belə etiraf edirlər ki, siz elə bilirsiniz ki, mədə kiçiltmə əməliyyatından sonra ömür boyu zərif qalacaqsız, siz yanılırsınız. Böyük kütlə bilir, bu haqda məlumatlara sahiblənir. Amma balaca kütlə savadını artırmaq istəmir. Onların işi-gücü yoxdur. Bədbəxtdirlər. Ona görə də mən çəkilmişəm kənara, qanun işini görür” deyə müğənni bildirib.
Emma Ələkbərzadə xüsusi pəhriz proqramı ilə artıq çəkilərdən xilas olduğunu bildirib.
“Uzun illərdir, 2008-ci ildən bəri pəhrizdəyəm. Üstündən gör neçə illər keçib, mən yenə də formada qalmışam. Çünki buna iradə, güc, səbr lazımdır. Yemək də yeyirəm, amma qədərində. Süfrədən ac durmaq lazımdır. Çalışıram belə edim. Gör neçə ildir arıqlamışam, hələ də insanlar bunu müzakirə edirlər” deyə sənətçi bildirib.