"Oğlum şəhid olandan 3-4 ay sonra mənə vətəndaşlıq verildi". DİA.AZ xəbər verir ki, bu sözləri Bizim.Media-ya verdiyi açıqlamada İkinci Qarabağ müharibəsi iştirakçısı, şəhid Romir Əliyevin anası, əslən Moldovadan olan Əliyeva Miroslava Petro qızı söyləyib.
Miroslava xanım bildirib ki, o Azərbaycanı çox sevir. Ailə qurduqdan bir neçə il sonra həyat yoldaşı Rəşadət Əliyevdən xahiş edib ki, onu Azərbaycana gətirsin:
"Ailəmizin daha möhkəm və vətənə sədaqətlə yetişməsi üçün Azərbaycana gəlməyimiz vacib idi. Mən yeganə oğlum Romiri milli ruhda, Azərbaycan ənənələri ilə vətənə, millətə bağlı şəkildə böyütdüm. Adətən ana vətən deyirlər. Buna görə də Romirimə deyirdim ki, Azərbaycan sənin həm anandır, həm də atan. Oğluma heç zaman anasının başqa millətdən olduğunu hiss etdirmədim. Digər şəhidlərimizi də öz balamdan ayırmadım. Bir dəfə Romirim üçün ağlayanda, üç dəfə də Əli, Məhərrəm və Eşqin üçün ağlamışam".
25 il Azərbaycanda miqrant kimi yaşayan şəhid anası bildirib ki, onun vətəndaşlıq almasında millət vəkili Qənirə Paşayeva yaxından köməklik göstərdi:
"Xanım Paşayeva oğlumun şəhid olduğunu bilən kimi zəng vurub bizimlə görüşdü. Mənim vətəndaşlıq almağım üçün qurumlarla birbaşa müzakirələr apardı və 3-4 ay ərzində vətəndaşlıq almağıma köməklik göstərdi. İndi yeganə arzum Birinci Vitse Prezident Mehriban xanım Əliyeva ilə görüşməkdir. Sadəcə əlini sıxıb şəhid ailələrinə etdiyi yardımlar üçün ona təşəkkür etmək istəyirəm”.
Moldovan əsilli şəhid anası açıqlaması zamanı hazırda işlə təmin olunmaq istəməsini də dilə gətirib:
"Mən 25 il Azərbaycanda miqrant kimi yaşadığım üçün mənə rəsmi olaraq işləmək hüququ verilmədi. Oğlum şəhid olduğu zaman Lənkəran Rayon İcra Hakimiyyətinə iş üçün müraciət etdim. Onlar həyat yoldaşımı şəhidlər xiyabanında abadlıq işləri ilə bağlı işə cəlb etdikləri üçün o zaman mənə işlə bağlı kömək edə bilməyəcəklərini bildirdilər. İndi Romirin atası hər gün öz oğlunun uyuduğu xiyabandakı torpağı belləyir. Sanki o, torpaqdan oğlumuzun qoxusunu alır.
Mən isə məşqulluq mərkəzinə iş üçün müraciət etmişəm. Həmçinin dərzi kimi fəaliyyətə başlamaq üçün özünəməşqulluqla bağlı Sosial Müdafiə Nazirliyində qeydiyyatdan keçmişəm, amma hələ ki, konkret bir cavab ala bilməmişəm.
Dərzi kimi fəaliyyətə başlaya bilsəm, ilk işim əsgərlərimiz üçün hərbi formalar tikmək olacaq. Əminəm ki, öz əllərimlə hazırladığım formaları geyinən əsgərlərimiz onu şəhid anasının tikdiyini bildikləri zaman daha şücaətlə və mərdliklə döyüşəcəklər".
Qeyd edək ki, İikinci Qarabağ müharibəsi şəhidimiz Romir Əliyev 14.05.1997 tarixində anadan olub.
Şəhidimiz 28.09.2020 tarixində vətən borcunu yerinə yetirmək üçün yenidən hərbi xidmə çağırılıb. Fizuli, Cəbrayıl və Qubadlının azad olunması uğrunda gedən döyüşlərdə fərqlənən Romir Əliyev, 22.10.2020-ci ildə Qubadlıda şəhidlik zirvəsinə yüksəlib.
Allahdan şəhidimizə rəhmət, ailəsinə və onu Azərbaycan ruhunda yetişdirən anası Miroslava Əliyevaya səbr diləyirik!
