 |
|
|
Azərbaycanda orta aylıq əməkhaqqı uzun müddətdir yerində sayır. 2024-cü ilin fevralında məbləğ ilk dəfə 1000 manat həddini keçmişdi. Sonradan il ərzində orta aylıq əməkhaqqı qeyri-sabit qrafik cızmağa başladı. Hətta məbləğin 1000 manatdan aşağı düşdüyü də oldu. İndi göstəricinin 1009,2 manat olduğu bildirilir.
Bizimyol.info xəbər verir ki, Azərbaycan orta aylıq əməkhaqqına görə Cənubi Qafqazda axırıncı yerdədir. Həm Gürcüstandan, həm də Ermənistandan geri qalırıq. Gürcüstanda hələlik 2024-cü ilin üçüncü kvartalının göstəricilərinə uyğun danışmaq olur. Onda ölkədə orta aylıq əməkhaqqı 2056 lariyə çatmışdı. Söhbət təxminən 1250-1255 manatdan gedir. Ermənistanda göstərici daha yüksəkdir. Bu ölkədə orta aylıq əməkhaqqının hələ keçən ilin payızında 279 min dram olduğu açıqlanmışdı. Yəni 4-5 ay əvvəl məbləğ 1200 manatı keçmişdi. Göstəricinin daha yüksək olduğunu eşitsək, təəccüblənmərik.
Özü də Gürcüstanda bir il ərzində orta aylıq əməkhaqqı 11 faizə yaxın artıb. Azərbaycanda bu istiqamətdə yerimizdə saydığımızı əminliklə demək olar. Ermənistanda da son bir il ərzində artımın 7,2 faiz olduğu qeyd edilir.
Azərbaycan məvaciblərin aşağı olması çox ciddi problemdir. Qiymətlər sürətlə artır, nominal gəlirlərin yüksəlməsi heç nəyi dəyişmir. Çünki nəticədə real gəlirlər artmır, hətta azaldığını müşahidə edirik.
Hələ mədən sənayesində yüksək maaşlar olmasa, göstərici daha aşağı olar. Yəni neft-qaz sektorunda 3400 manata yaxınlaşan rəqəmlər orta aylıq əməkhaqqını xilas edir. Bu sektorda məvaciblər həmişə yüksəkliyi ilə fərqlənir. Dövlət Statistika Komitəsi, məhz bu amillərə görə median əməkhaqqını əsas kriteriya kimi göstərmək istəmir. Çünki onda əksəriyyətin 600-650 manatdan yüksək maaş almadığı üzə çıxacaq. Mədən sənayesinin hesabına isə orta aylıq əməkhaqqını 1000 manatdan yüksək göstərmək olur.
Neft qiymətlərinin aşağı düşməsi belə düşünməyə əsas verir ki, 2025-ci ildə də çox şey dəyişməyəcək. Maaşların artması ehtimalından danışılmır. İqtisadi perspektivlər də parlaq görünmür.