Sədərəkdə dünən polislərin keçirdiyi etiraz aksiyasının səbəbləri aydın oldu.
Polislərin dediklərinə görə, onlar çox ağır iş rejimində işləyirlər. 1 sutka işdə, 1 sutka evdə. Üstəlik, postları təhvil almaq və vermək, hər səhər sıraya düzlənmək, rəisin məruzələrini dinləmək kimi hərəkətlər də bir neçə saat vaxt aparır. Beləcə, faktiki olaraq hər günaşırı 28 saat istirahətsiz işləmək, 20 saat dincəlmək onların həyatını çəkilməz hala gətirir. Halbuki əmək qanunvericiliyinə görə, 24 saat işləyən hər kəs ən azı 48 saat dincəlməlidir. Onların isə bu hüququ kobud şəkildə pozulur.
Dünən bu vəziyyətlə barışmayan Sədərək polisləri etiraz aksiyası keçiriblər. Etirazçıları sakitləşdirmək üçün MR Daxili İşlər naziri Rəşad İsmayılov və onun müavini Zahid Gözəlov Sədərəyə gedib. Amma polisləri sakitləşdirmək asan olmayıb. Bəzi polislər hətta özlərini yandıracaqları ilə naziri və müavinini təhdid edib.
Polis etirazlarının Naxçıvanın digər rayonlarına da sıçraya biləcəyi ehtimalı var.
Heyder Oguz
Teref.az