 |
|
|
Abşeron Rayon Mərkəzi Xəstəxanası Abşeron rayonu ərazisindən, eləcə də ölkənin müxtəlif bölgələrindən müraciət edən vətəndaşlara və vətəndaşlığı olmayan şəxslərə xidmət göstərir.
TEREF yazır ki, bu barədə İqtisadiyyat.az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) məlumat verilib.
Qeyd edilib ki, 2024-cü il üçün statistik məlumata əsasən, təkcə rayon ərazisində rəsmi olaraq 432,8 min nəfər, qeyri-rəsmi məlumatlara görə isə 800.000-dən çox əhali yaşayır. Xəstəxanaya müraciət edən əhalinin sayının günlük 2500-3000 arasında dəyişdiyini nəzərə alsaq, sıxlıq başa düşüləndir.
"Bundan əlavə, vətəndaşlarımızın əksəriyyəti yaşadıqları ərazi üzrə ailə sağlamlıq mərkəzlərində çalışan ailə həkiminə yaxınlaşmaq əvəzinə, mərkəzi xəstəxanaya birbaşa müraciət etməklə bu sıxlığı daha da artırmış olurlar.
Tibb müəssisəsinin rəhbərliyi tərəfindən əhaliyə əlçatan tibbi xidmətin göstərilməsi üçün Qeydiyyat bölməsində göstərilən xidmətə uyğun (radioloji müayinələr, 3 yaşadək uşaqlar və əllilliyi olan şəxslər, şəhid ailəsi və qazilərlə iş, göndərişlər, arayışlar və digər müraciətlər üzrə) adlandırılaraq daha operativ qeydiyyat işinin təşkili üçün masalar quraşdırılıb.
Vətəndaşların rahatlığının təmin edilməsi üçün gözləmə zonası yaradılıb. Bölmə həftənin bazar ertəsi-şənbə günləri olmaqla, 6 günü səhər saat 08:30-dan etibarən vətəndaşlara xidmət göstərir.
Qeyd edilən şikayətlə bağlı xüsusi olaraq qeyd etmək istəyirik ki, elektron növbə qəbzləri səhər saat 07:00-dan etibarən verilməyə başlayır və ilk nömrə 1001 olaraq qeyd edilir. Növbə qəbzlərinin ödənişlə satılması iddiası tamamilə əsassızdır və həqiqəti əks etdirmir.
Neqativ hallarla qarşılaşdığınız təqdirdə araşdırılması və məsələnin operativ həll edilməsi üçün tibb müəssisəsinin rəhbərliyinə, habelə TƏBİB-in 815 qaynar xəttinə məlumat verməyiniz xahiş olunur",-deyə məlumatda bildirilib.