Ulu Öndər Heydər Əliyevin "Gənclər bizim gələcəyimizdir" ifadəsi bu sahəyə göstərilən diqqət və qayğının ən böyük təzahürüdür. Təsadüfi deyil ki, bu ideologiya Prezident İlham Əliyev tərəfindən də uğurla davam etdirilir. Gələcəyimizin əmin əllərdə olması, sağlam gəncliyin yetişməsi üçün bir çox işlər həyata keçirilir. Lakin təəssüflər olsun ki, regionlarda gənclərlə işləməyə, onların fiziki və mənəvi inkişafına töhfə verməyə, pis vərdişlərdən uzaqlaşması üçün müxtəlif layihələr həyata keçirməyə cavabdehlik daşıyan bəzi qurumlar heç də öz işlərinin öhdəsindən uğurla gələ bilmir. Lap elə Sumqayıt Gənclər və İdman Baş İdarəsi kimi...

Bəli, Sumqayıt sakinlərinin böyük əksəriyyətinin adıçəkilən qurumu tanımaması, onun gördüyü işlərdən xəbərsiz olması Sumqayıt Gənclər və İdman Baş İdarəsinin fəaliyyətsizliyinin ən bariz göstəricisi hesab oluna bilər. Görünür, adıçəkilən qurum yalnız bir qrup gənci öz ətrafına toplayaraq müxtəlif layihələr keçirməklə işini bitmiş hesab edir. Amma Sumqayıt gəncliyinin problemləri, onların qayğıları, mütərəqqi ideya və təklifləri heç kimi maraqlandırmır. Elə bunun nəticəsidir ki, şəhər gəncləri Sumqayıt Gənclər və İdman Baş İdarəsinin fəaliyyətini qənaətbəxş hesab etmir.

Tehsilmedia.az xəbər verir ki, 2018-ci ildən Sumqayıt Gənclər və İdman Baş İdarəsinə rəhbərlik edən Elgün Hümbətova etimadlar böyük olsa da, onun bu ümidləri doğrulda bilməməsi, şəhər gəncliyinin inkişafı üçün əlində olan imkanlardan istifadə etməməsi, gənclərlə bağlı heç bir iş görməməsi göz qabağındadır. Müxtəlif tender müsabiqələrində yol verilən maliyyə maxinasiyaları ilə bağlı məlumatların yerli mediada dərc olunması və səslənən iddiaların cavabsız qalması cənah Hümbətovun "fəaliyyəti" haqda müəyyən suallar doğurur. Məsələn Gənclər və İdman Baş İdarəsinin gənc şirkətlərlə böyük sövdələşməsini əks etdirən, beləcə maliyyə maxinasiyalarına yol açan hərəkətləri haqda yerli mediada müxtəlif materiallar yayımlanıb. Belə ki, 2021-ci ildə Gənclər və İdman Baş İdarəsi tərəfindən elan olunan tender müsabiqəsinin heç bir təcrübəsi olmayan və cəmi bir-iki ay öncə yaranan şirkətlərə həvalə edilməsi adıçəkilən idarənin qaranlıq məqamlarından xəbər verir. https://www.regionxeberlericom.az/gun/58467-gencler-idaresinin-genc-sirketlerle-boyuk-sovdelesmesi-teferruat.html
Sumqayıt şəhər Gənclər və İdman Baş İdarəsinin rəisi Elgün Hümbətov isə səslənən iddaların heç bir əsasının olmadığını bildirir.

Doğrudur, Elgün Hümbərtovun səmimi şəkildə medianın suallarını cavablandırması təqdirəlayiq hal kimi dəyərləndirilə bilər. Lakin bu, idarə rəisinin Sumqayıt gəncləri ilə bağlı heç bir iş görməməsi faktını dəyişdirmir. Görünür, vaxtilə Abşeronda mühüm vəzifələrdə işləyən Elgün Hümbətovun şəhər rəhbərliyi ilə yaxşı əlaqələrə malik olması onun özünü "toxunulmaz kadr" kimi hiss etməsinə zəmin yaradır. Üstəlik, hörmətli rəisin həyat yoldaşı şəhər məktəblərindən birində direktor vəzifəsini icra edir. Yəni, dolayısı ilə gələcəyimiz olan gənclərin layiqli vətəndaş kimi yetişməsində Hümbətovlar ailəsinin rolu çox böyükdür. İdarə rəisinin direktor xanımının öz işinin öhdəsindən necə gəldiyi haqda heç nə deyə bilməsək də, Elgün Hümbətovun fəaliyyətsizliyi göz önündədir.

Şəxsi mənbələrdən əldə etdiyimiz məlumatlara görə, Elgün Hümbətovun öz işinin öhdəsindən layiqincə gələ bilməməsi haqda artıq yuxarı dairələrdə də xəbərdardırlar və hörmətli rəisin tezliklə öz vəzifəsi ilə vidalaşacağı gözlənilir. Dövlətin göstərdiyi etimadı doğrultmaq və vəzifəsini layiqincə yerinə yetirmək hər bir məmurun mənəvi borcudur. Bunun öhdəsindən gələ bilməyənlərin "kreslo"da əyləşməsi isə sadəcə vaxt itkisidir. Ümid edirik ki, gənclərlə bağlı dövlətin həyata keçirdiyi işlərin yerlərdə də uğurla davam etdirilməsi üçün düzgün kadrların təyin olunması prioritet təşkil edəcək.