Demə, Suraxanı Rayon İcra Hakimiyyəti yanında “Özbaşına tikintilərə qarşı mübarizə və məhkəmədənkənar torpaq mübahisələrinin həlli üzrə komissiya” da varmış. Və iki ay əvvəl, daha doğrusu, 3 aprel 2024-cü il tarixdə mediada məlumat yayıldı ki, həmən bu klomissiyanın üzvləri tərəfindən rayon ərazisində qanunsuz tikintilərlə bağlı mübarizə tədbirləri çərçivəsində reydlər keçirilir. Bəs, komissiya tərəfindən aşkar edilmiş qanunsuz inşa edilən tikililər müvafiq qurumların iştirakı ilə sökülür və nəzarətə götürülür.
Amma əslində “komissiya” rayon rəhbərliyinin tələb etdiyi rüşvəti vermədən qanunsuz tikinti sahibləri ilə savaşır. Çünki cənab Əziz Əzizovun İcra Hakimiyyətinin başçısı vəzivəsində işlədiyi son beş ildə Suraxanıda qanunsuz tikililərə rəvac verilir, özü də yaşıllıqların məhvinin müşayiəti ilə. İcra Hakimiyyəti qanunsuz tikintilərə icazəni qeyri-rəsmi verir, aldığı rüşvəti də Dövlət Şəhərsalma və Arxitektura Komitəsi yanında Memarlıq və Şəhərsalma Baş İdarəsinin mənsublarıyla paylaşmır. İşin üstü açılanda isə zərərçəkən yenə tikintini aparan şəxslər olur, rayon rəhbərliyi onları qanun qarşısında meydanda tək buraxaraq deyir ki, “gedin, özünüz yoluna qoyun”.
Nədənsə, Suraxanı Rayon İcra Hakimiyyəti yanında “Özbaşına tikintilərə qarşı mübarizə və məhkəmədənkənar torpaq mübahisələrinin həlli üzrə komissiya”nın üzvləri rayonun Qaraçuxur qəsəbəsi, Əhməd Mehbalıyev küçəsi, 2 ünvanda ağacların məhv edilməsini və yerində ticarət mərkəzinin tikilməsini “görməyiblər”. Özü də əvvəlcə yaşıllıq ərazini daşla hasarlayaraq “yaman gözlərdən” gizlədir, arxasında “yaşıl qətliam” həyata keçirirlər. “Komissarlarınn” gözlərini nəyin kor etdiyini təxmin etməyi oxucuların ixtiyarına buraxırıq. Video-görüntülərlə qeydə aldığımız faktla bağlı Suraxanı RİH-nə göndərdiyimiz məktuba cavab almamışıq. Mənzil Kommunal Təsərrüfatı Birliyinin direktoru Mais müəllim məsələnin ona aid olmadığını söyləməklə kifayətləndi. Sonradan sakinlərdən öyrəndik ki, sözügedən ticarət mərkəzini və bir çox başqa qanunsuz tikililərin Əziz Əzizovdan icazəsini “qara kassa” kimi tanınan Əvəz adlı bir nəfər funksioner alır. Xeyli səy göstərib həmin adamın telefon nömrəsini də öyrəndik. Zəng vurduq, bildirdi ki, mən həkiməm, tikinti ilə heç bir əlaqəm yoxdur, hamı yalan danışır, əlləm-qəlləm işlərlə məşğul deyil. Lakin şəxsin telefon nömrəsini “Getkontakt” servisində axtarış edəndə həkimliyi ilə bağlı heç bir məlumat ortaya çıxmadı, əksinə, qara-qura əməl sahiblərinə deyilən ayamalar, ləğəblər gözə dəydi. Getkontaktda 200 ədəd nömrənin əksəriyyəti «Əvəz Hüseyinov Suraxanı icra» çıxdı.
Maraqlıdır bu kişi görəsən nəyi icra edir. Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsinə ünvanladığımız məktuba belə bir cavab aldıq. Arxitektura Komitəsi yanında Bakı Şəhər Memarlıq və Şəhərsalma Baş İdarəsinin əməkdaşları tərəfindən Suraxanı rayonu, Qaraçuxur qəsəbəsi, Əhməd Mehbalıyev küçəsi, 2 ünvanında bir müddət öncə şəhərsalma nəzarəti qaydasında keçirilmiş monitorinq nəticəsində qeyri-yaşayış obyektinin özbaşına tikinti işlərinin aparılması faktı aşkarlanaraq aidiyyəti qurumlar tərəfindən sökülməsi təmin edilib.
Sözügedən ünvana 11 iyun 2024-cü il tarixində baxış zamanı isə heç bir müvafiq icazəverici sənədləri olmadan yenidən tikinti işlərinin aparıldığı müəyyən edilib və müvafiq tədbirlərin görülməsi üçün Bakı Şəhər Memarlıq və Şəhərsalma Baş İdarəsi tərəfindən aidiyyəti qurumlara müraciət olunub. İcra hakimiyyətinin bu «priyomu»da işə keçmədiyindən şəhid ailəsi adı ilə redaksiyamıza zəng edib bizə hədə qorxu gələrək təhqir etdirir.
Mövzuya qayıdacağıq.
Deryaz.az