 |
|
|
Samuxun Qarayeri qəsəbəsində yerləşən 2 saylı tam orta məktəbdə müəllimlə direktor arasında insident baş verib.
Yəni 48 yaşlı ibtidai sinif müəlliməsinin 38 yaşlı direktor tərəfindən döyüldüyü iddia edilib. İddiaya görə, həmin məktəbin direktoru Şahin Məmmədov 2014 -ci ildə Göygöl rayon Mədəniyyət və Turizm Şöbəsində məsləhətçi vəzifəsində çalışarkən nöqsanlara görə işindən azad edilib. Yəni 17 iyul 2014-cü ildə Mədəniyyət və Turizm Nazirliyinin əmri ilə dövlət qulluğuna xitam verilib.
Sosial şəbəkələrdə yayılan məlumata görə, Şahin Məmmədovla müəllim arasındakı insidenti araşdıran Gəncə-Daşkəsən Regional Təhsil İdarəsindən ictimaiyyətlə əlaqələr şöbəsinin məsul şəxsi Raminə Məmmədova Şahin Məmmədovun bacısıdır. İddiaya görə, məhz bu səbəbdən komissiya direktorun müəllimi döymədiyi ilə bağlı rəy verib.
GUNDEMİNFO.AZ xəbər verir ki, məsələ ilə bağlı Raminə Məmmədova “Cebhe.info”-ya açıqlamasında Şahin Məmmədovun bacısı olduğunu təsdiqləyib. O, komissiyada qardaşını qoruduğu iddialarını yalanlayıb:
“Mən komissiyanın üzvü deyildim. İddialar əsassızdır”.
Xatırladaq ki, məsələni araşdıran komissiyanın tərkibinə Gəncə – Daşkəsən Regional Təhsil İdarəsinin hüquqşünası, Gəncə şəhəri və Samux rayonu üzrə təhsil sektorlarının tabeliyində fəaliyyət göstərən ümumtəhsil məktəblərinin psixoloqları və digər əməkdaşlar daxil ediliblər.
“Komissiya üzvləri məktəbin direktoru və şikayətçi müəllimin, şahid qismində isə direktor müavininin izahatlarını alıblar. Araşdırma zamanı məlum olub ki, direktor müəllimə qarşı hər hansı bir güc tətbiq etməyib, ondan şəxsiyyət vəsiqəsini istəyib və müəllim imtina etdikdən sonra mübahisə baş verib. Belə olduqda isə direktor sinif otağını tərk edib. Qeyd edək ki, məsələ hazırda hüquq-mühafizə orqanları tərəfindən araşdırılır”,-deyə komissiyanın yaydığı rəydə bildirilib.