2024-cü ilin birinci rübündə Gürcüstanda orta aylıq nominal əmək haqqı 1943,4 lari(təxm. 1144,22 AZN) olub.
Moderator.az xəbər verir ki, bu haqda “Newsgeorgia” nəşri məlumat yayıb.
Bildirilir ki, qeyd edilən məbləğə gəlir vergisi daxildir, yəni nağd ələ gələn gəlir 20% az olur.
Ötən ilin müvafiq dövrü ilə müqayisədə maaşlarda 226,8 lari və ya 13,2% artım. Lakin ötən ilin dördüncü rübü ilə müqayisədə bu, 101 lari azdır.
Bütün sektorlarda kişi və qadınların qazancı arasında böyük fərq qalmaqdadır. Kişilər üçün orta nominal əmək haqqı 2343,2 lari, qadınlar üçün 1540,0 lari təşkil edir.
Ən yüksək orta əmək haqqı -4 min laridən çox -maliyyə və sığorta fəaliyyəti, eləcə də informasiya və rabitə sahələrindədir.
Regionlar üzrə: ən yüksək orta əmək haqqı Tbilisidə 2305 laridir(təxm. 1357,4 AZN); ən aşağı Raça Leçxumi/Kvemo Svaneti regionundadır - cəmi 996,8 lari.
Azərbaycan Dövlət Statistika Komitəsinin iyunun 12-də yaydığı son məlumata görə, 2024-cü ilin yanvar-aprel aylarında ölkə iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 10,2 faiz artaraq 1007,5 manat olub. Paytaxt Bakıda isə yanvarın 1-nə orta maaş 1183 manat həddində rəsmiləşib.
İqtisadiyyatın mədənçıxarma sənayesi, maliyyə və sığorta fəaliyyəti, peşə, elmi və texniki fəaliyyət, informasiya və rabitə, eləcə də nəqliyyat və anbar təsərrüfatı sahələrində orta aylıq nominal əməkhaqqı daha yüksəkdir.
Qeyd edək ki, Azərbaycanda muzdla çalışan işçilərin sayı 1 milyon 749 min 700 nəfərdir. Onlardan 897 min nəfəri iqtisadiyyatın dövlət sektorunda, 852,7 min nəfəri isə qeyri-dövlət sektorunda fəaliyyət göstərir
Belə çıxır ki, Gürcüstanda orta aylıq nominal əmək haqqı Azərbaycandakından 137 AZN yüksəkdir.
Son məlumatlara görə, Ermənistanda da orta aylıq nominal əmək haqqı Azərbaycanla müqayisədə 150 dollar çox olub. Belə ki, ötən il Ermənistanda orta aylıq əmək haqqının məbləği 700 dollar (269 994 dram və ya 1 190 AZN) təşkil edib.