 |
|
|
Tanınmış aparıcı İlham Mirzəyev "Space TV"dən ayrılmağının səbəblərini açıqlayıb.
İ.Mirzəyev Pravda.az-a açıqlamasında kanalla yollarının ayrılmasını belə izah edib:
“Övladlarım xaricdə təhsil alırlar. Azərbaycanda da xəstə anam olduğu üçün məcbur idim ki, ölkəyə gələm. Övladlarım Türkiyədə, mən Azərbaycanda. Alındıra bilmirəm. Həm də 29 il idi, televiziyada çalışırdım, istəyirdim ki, təcrübəmi 1 il də artırım. "Space" kanalının rəhbəri Vado Korovinə xüsusi təşəkkür edirəm ki, mənə 1 il şərait yaratdı, çalışdım. Həm övladlarımı dolandırdım, həm də bu sahədə 30 ilim tamam oldu. Təcrübəmin 11 ilini Azərbaycan Dövlət Televiziyasında, qalan müddəti də "Space" televiziyasında fəaliyyət göstərdim. Ümumi televiziya stajım 30 il oldu. Həm də çətindir, çünki “Evimin qonaqları” verlişini evimdə çəkirdim, evim də əldən gedirdi. Sağ olsunlar, bir neçə kanaldan təklif gəlir, amma hələ dəyərləndirirəm. Çünki yaşım da keçib axı, cavanlara meydan vermək lazımdır. Artıq bizim dövrümüz keçib. Reytinqə görə özümüzü öldürə, meymunluq edə bilmərik. Düzdür, yaxşı aparıcılarımız var, hamısına hörmət edirəm. Lakin hərənin öz dəsti-xətti var. Mən istəyirəm ki, “Etiraf”, “Münəccim”, “Tale yolları” verilişi elə brend olaraq qalsın. Artıq yaşlaşmışam, üzüsulu getməyim daha yaxşıdır. Efirdən də görürəm ki, yaşlaşmışam. Enerjim var, dediyim kimi, təkliflər gəlir. And içirəm, hələ heç bir kanalla bağlı fikrim yoxdur. Əslində fikrim, ümumiyyətlə, efirə çıxmamaqdır. Amma hələ dəyərləndirirəm. Hansı kanalın maaşı mənə sərf edəcəksə, ora da gedəcəyəm. "Space" mənim doğma evim idi, evim olaraq da qalır. Veriliş aparmasam da, ora gedib-gələcəyəm. Çünki "Space" mənim üçün müqəddəs bir məbəddir. Bir daha Vado Korovinə minnətdarlığımı bildirirəm, Allah ona uzun ömür, cansağlığı versin. Yenidən kameraları, tamaşaçı sevgisini gördüm. Şərait yaratdı, mənə hörmət etdi, ayrıca otaq verdi. Bir neçə verilişi aparmağıma şans yaratdı. “Yaxşıya doğru”, “Evimin qonaqları" verilişlərini apardım və özümü doğrultdum, reytinqli verilişlər oldu. Bütün yayı efirə getdi. Vado müəllim mənə çox yaxşılıq etdi. Kanaldan getdiyimə görə özüm özümdən xəcalət çəkirəm ki, o adamı niyə yarı yolda qoydum? Köhnə aparıcı kimi çox diqqət və qayğısını gördüm. Məni bir də ayağa qaldırdı, qardaş kimi oldu. Amma məni bağışlasın ki, artıq o enerjim tükənib, o cür verilişlər apara bilmirəm. 59 yaşım var, övladlarımın da elə vaxtıdır ki, onları yiyəsiz buraxa bilmərəm. "Space"dən ayrılmağımın başqa heç bir səbəbi, yaxud incikliyim yoxdur. Hazırda məzuniyyətdəyəm, adım oktyabrın 2-dək hələ də kanaldadır”.
İ.Mirzəyev televiziya kanallarının vəziyyətindən də danışıb: “Bilirsiniz ki, bu gün efirlərdə nə ilə gündəmə gəlirlər... Abırlı veriliş aparırsan, baxan yoxdur. Amma kimsə kimisə vursun, yıxsın, şərəf və ləyaqətini alçaltsın, baxacaqlar. Mən illərin aparıcısı olduğuma görə heç bir kanalın, sənətin, sənətkarın şərəfinə, ləyaqətinə toxuna bilmərəm. Çünki onlar mənim itirilməz xəzinələrimdir. Bu günə qədər o sənətkarların hörmətində, diqqətində varam, ətrafımdadırlar. Bu mənim üçün böyük nemətdir. Efirlər “reytinq, reytinq” deyə-deyə cəmiyyətin əleyhinə işləyir. Mən bunu edə bilmərəm. Hava Limanına gəlirəm, inanın, məni elə gözəl qarşılayırlar. İstər Dövlət Sərhəd Xidməti, istər gömrük işçiləri, adi insanlar. Analar məni bağırlarına basırlar. Deyirəm ki, ay Allah, mən nə xoşbəxt aparıcı olmuşam ki, bu günə kimi unudulmadım. Allah bunu mənə çox görməsin...”