Ermənistanın baş naziri Nikol Paşinyan ölkəsinin təhlükəsizliyini təhdid altına salır.

Bu barədə ABŞ-nin Müharibə Araşdırmaları İnstitutunun hesabatında yazılıb.

Qeyd olunub ki, N.Paşinyan zəif siyasətçidir.

Hesabatda yazılıb ki, Kremlə bağlı mənbələr də bu barədə tənqidi fikirlərini davam etdirirlər.

Qeyd edək ki, ABŞ institutu daha əvvəl yazmışdı ki, Rusiyadan uzaqlaşmaq N.Paşinyana baha başa gələ bilər.

Xatırladaq ki, Ermənistanla Rusiya arasında münasibətlər sürətlə pisləşir. Rəsmi İrəvan daha əvvəl Kollektiv Təhlükəsizlik Müqaviləsi Təşkilatı (KTMT) daxilində fəaliyyətini dayandırdığını bildirib və bunun hüquqi cəhətdən də baş verəcəyini istisna etməyib. Rəsmi Moskva bu mövqeyinə görə İrəvandan izahat tələb edir.
pressklub

Nikki Heyli Respublikaçılar Partiyasından prezidentliyə namizədlik uğrunda mübarizədən imtina etdiyini açıqlayıb.

O, tərəfdarlarını ABŞ prezident seçkisində Trampı dəstəkləməyə çağırmayıb.

Qeyd edək ki, Heylinin ABŞ prezidentliyinə namizədlik uğrunda mübarizədən geri çəkilməsi Trampı Respublikaçılar Partiyası üçün öncül namizəd edir. ( TASS)

Azərbaycan Türkiyə və Rusiya arasında üçtərəfli əməkdaşlığın möhkəmlənməsi Cənubi Qafqazın sabit regiona çevrilməsinə töhfə verə bilər.

Rusiya xarici işlər naziri Serqey Lavrov martın 2-də Antaliya Diplomatiya Forumunda çıxışı zamanı Azərbaycanla bağlı mühüm bəyanatlar səsləndirib.

Azərbaycanın xarici siyasət kursunun Rusiya tərəfindən yüksək qiymətləndirildiyini deyən S.Lavrov rəsmi Bakının heç bir anti-Rusiya layihəsində iştirak etmədiyini bildirib. "Bir şeyi açıq bildirim ki, Azərbaycan heç bir anti-Rusiya siyasətində və lahiyəsində heç bir zaman yer almayacaq. Bu bizə lazım olan ən vacib amildir". Rusiyanın XİN rəhbəri Rusiyanın Azərbaycan, Türkiyə və digər türk dövlətləri ilə ortaq tarixi bağlantıların olduğunu da vurğulayıb.

“Rusiyada çoxlu türk xalqları yaşayır. Bu baxımdan Azərbaycan türk dünyası istiqamətində prioritet siyasəti Rusiya Federasiyası üçün müsbət məqamdır.

Çünki türk dövlətləri vahid Avrasiya məkanında Rusiya üçün qardaş və müttəfiq dövlətlərdir”,-deyən S.Lavrov Azərbaycanın Rusiya üçün müttəfiq dövlət olduğunu da qeyd edib:

"Bu baxımdan biz müttəfiqlik münasibətlərinə uyğun olaraq Azərbaycanın maraqlarına, suverenliyinə hörmət edirik və öz siyasətimizdə bu amilləri nəzərə alırıq".

Serqey Lavrovun Antaliya Diplomatiya Forumunda Azərbaycanı regionun önəmli ölkəsi kimi təqdim etməsi regional sülh və təhlükəsizliyin möhkəmlənməsi istiqamətində Azərbaycan-Rusiya tərəfdaşlığının əhəmiyyətini daha da artırır.

Maraqlıdır, iki ölkə arasında tərəfdaşlığın müttəfiqliyə çevrilməsi üçün imkanlar varmı? Xüsusilə, Cənubi Qafqazda hər hansı gələcək təhlükələrin qarşısının alınması, regiondakı problemlərin həlli və regional proseslərin nizamlanmasına təkan verəcək Rusiya-Azərbaycan-Türkiyə əməkdaşlığına nə dərəcə ehtiyac var? Ən əsası da Türk Dövlətləri Təşkilatı ilə Avrasiya İqtisadi İttifaqı arasında vahid Avrasiya konsepsiyasına söykənən qarşılıqlı münasibətlərin qurulması və əməkdaşlığın inkişafı üçün ikitərəfli lazımi addımların atılmasının zamanı çatıbmı?

Məsələ ilə bağlı politoloq Elşən Manafov “Cebhe.info”-ya açıqlamasında qeyd edib ki, regionda dayanıqlı sülh və sabitliyin bərqərar olması Azərbaycan, Türkiyə və Rusiyanın təhlükəsizlik sahəsində qarşılıqlı əməkdaşlığın inkişafından asılıdır:

“2022-ci ildən bəri Azərbaycanın Rusiya ilə münasibətlərinin müttəfiqlik müstəvisinə keçməsi regionun geosiyasi konfiqurasiyasına təsir göstərməklə yanaşı, təhlükəsizliyin təmin olunmasına münasib şərait yaradıb. Azərbaycan regionda təhlükəsizliklə bağlı problemlərin məhz “3+2” formatı çərçivəsində həll olunması və bu model əsasında dövlətlərarası əməkdaşlığın möhkəmlənməsinin tərəfdarıdır. Azərbaycan regiondankənar ölkələrin proseslərə müdaxiləsinə qarşıdır. Təbii ki, bu format çərçivəsində region ölkələri arasında əməkdaşlığın qurulması Qərbin maraqlarına uyğun deyil. Buna görə də Qərb bu formatın reallaşmaması üçün Ermənistan üzərindən müxtəlif manevrlər etməklə regionda hərbi-siyasi vəziyyəti gərginləşdirməyə çalışır. Belə desək, ABŞ da, Fransa da, Avropa İttifaqı da Ermənistandan öz maraqlarını təmin etmək üçün siyasi alət kimi istifadə edir. Azərbaycanın Rusiya ilə münasibətləri Qərbi məmnun etmir. Qərbin təhdidlərinə baxmayaraq, rəsmi Bakı Rusiyaya qarşı tətbiq olunan sanksiyalara qoşulmayıb. Azərbaycan ilə Rusiya arasında diplomatik-siyasi, iqtisadi-ticari və enerji münasibətləri daha da inkişaf edib. Münasibətlərin şaxələnməsi digər sahələrdə də özünü göstərir. Azərbaycan logistik baxımdan da Rusiya üçün xüsusi əhəmiyyət kəsb edir”.

E.Manafov Türk Dövlətləri Təşkilatı ilə Avrasiya İqtisadi İttifaqı arasında qarşılıqlı əməkdaşlığın qurulmasını vacib hesab edib:

“Bu, həm geosiyasi anlamda əhəmiyyətlidir, həm də region ölkələri arasında iqtisadi-ticari münasibətlərin genişlənməsinə töhfə verə bilər. Qeyd edim ki, Mərkəzi Asiyanın türk dövlətləri, xüsusilə Qazaxıstan və Qırğızıstanın KTMT və Avrasiya İqtisadi İttifaqı daxilində Rusiya, TDT daxilində isə Azərbaycan və Türkiyə ilə münasibətləri var”.

Strateji Planlaşdırma və Araşdırmalar İnstitutunun rəhbəri, siyasi şərhçi Azad Məsiyev də həmkarı ilə eyni fikirləri bölüşüb. A.Məsiyev qeyd edib ki, TDT ilə Aİİ arasında əməkdaşlıq potensialı kifayət qədər yüksəkdir:

“Cənubi Qafqazın sabit və təhlükəsiz regionuna çevrilməsi Türkiyə, Azərbaycan və Rusiyanın xarici siyasətində prioritet məsələ hesab olunur. Təəssüflər olsun ki, başda ABŞ olmaqla Qərb koalisiyası hər vəchlə Azərbaycan ilə Ermənistan arasında münaqişənin yenidən alovlanmasına çalışır. Məqsədi də gərginlikdən istifadə ilə Cənubi Qafqazda proseslərə müdaxilə etmək imkanı qazanmaqdır. Vaşinqtonun prinsipal strateji hədəfi Rusiyanın cənub cinahını bağlamaqdır. Bu baxımdan, ABŞ, o cümlədən Fransa Ermənistan üzərində Cənubi Qafqazda möhkəmlənməyə və təsir imkanlarını artırmağa can atır. Həm Vaşinqton, həm də Paris, həqiqətən Cənubi Qafqazın üç ölkəsini Rusiya ilə qarşıdurmaya sövq edir. Halbuki bu, ölkəmizin dövlət və milli maraqları ilə ziddiyyət təşkil edir. Azərbaycan heç vaxt Qərbin əlində alət olmayacaq. Azərbaycan müstəqil və balanslı xarici siyasətini bundan sonra da davam etdirəcək. Rusiya-Azərbaycan, həmçinin Rusiya-Türkiyə münasibətlərinin bugünki yüksək səviyyəsi Cənubi Qafqazda sülh, əmin-amanlıq və təhlükəsizliyin dayanıqlı olmasına müsbət təsir göstərəcək. Bu gün Moskva və Ankara Azərbaycanın regionun lider dövləti olduğunu qəbul edir. Moskvada çox yaxşı başa düşürlər ki, Rusiyanın İrana və Afrikanın cənub ərazilərinə, o cümlədən Türkiyəyə və oradan Şimali Afrikaya çıxış imkanları Azərbaycan-Rusiya münasibətlərinin inkişafından asılıdır. Ona görə də Cənubi Qafqazda sülh və sabitliyin olması Moskvanın maraqları üçün məqbuldur. Onu da əlavə edim ki, Azərbaycan və Türkiyənin Avrasiya İqtisadi İttifaqı ilə əməkdaşlıq etmək potensialı var. Rusiya da geostrateji təhlükəsizlik baxımından Türk Dövlətləri Təşkilatı ilə münasibətlər qura bilər”.

Səudiyyə Ərəbistanı Krallığının Azərbaycandakı fövqəladə və səlahiyyətli səfiri İssam bin Saleh əl-Cuteyli Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyevlə görüşüb.

Bu barədə Səudiyyə Ərəbistanı Krallığının Azərbaycandakı Səfirliyi məlumat yayıb.
Bildirilib ki, görüşdə qarşılıqlı maraq doğuran bir sıra mövzular müzakirə olunub.

Proseslər sürətləndikcə, ritorika da sərtləşir və (Rusiya XİN başçısı - red.) Lavrov artıq bu dəfə konkret hərəkətlərdən danışır.

TEREF axşam.az-a istinadən bildirir ki, bu sözləri erməni politoloq Armen Baqdasaryan Rusiya xarici işlər naziri Sergey Lavrovun Antalya Diplomatiya Forumunda Ermənistanla münasibətlərə Kremlin yenidən baxmağa məcbur edildiyi və İrəvanın KTMT ilə bərabər, digər inteqrasiya qurumları haqda da qərar verməsinin vacib olduğu haqda sözlərini şərh edərkən deyib.

O bildirib ki, hələlik Rusiyanın Ermənistana qarşı konkret hansı addımlar atacağı bəlli deyil:

"Çünki Rusiyanın Ermənistana bir neçə istiqamətdə təsir rıçaqları var. Məsələn, iqtisadi təsir rıçaqları, Rusiyada çoxlu sayda Ermənistan vətəndaşının olması, Ermənistan-Azərbaycan münaqişəsinin həll olunmaması və s. Təbii ki, bunların hamısı bizim üçün çox ağrılı məqamlardır və Rusiya Ermənistanın kəskin addımlarına cavab olaraq həmin ağrılı məqamların hər hansı birinə təsir göstərməyə çalışacaq. Ümid edək ki, bu, Ermənistanla Azərbaycan arasında birbaşa təcavüz olmayacaq. Demək çətindir, görəcəyik. Hər halda belə güman edilirdi ki, Ermənistan sərtləşdikcə, Qərbə doğru kəskin şəkildə getdikcə Rusiya da öz təsir rıçaqlarından istifadə etməyə çalışacaq".

O qeyd edib ki, Rusiya Ermənistanda hakimiyyət dəyişikliyini də təşkil edə bilər.

Politoloq xatırladıb ki, Nikol Paşinyanın Rusiyanın Ermənistanda hakimiyyət dəyişikliyinə cəhd etdiyini deməsi təsadüfi deyildi.

Azərbaycan Respublikasının xarici işlər naziri Ceyhun Bayramov Antalya Diplomatiya Forumu çərçivəsində Qazaxıstan Respublikasının baş nazirinin müavini, xarici işlər naziri Murat Nurtleu ilə görüşüb.

Azərbaycan və Qazaxıstan arasında mövcud ikitərəfli, o cümlədən çoxtərəfli əməkdaşlıq gündəliyindən məmnunluqla bəhs edən nazirlər, iki ölkə arasında dostluq, qardaşlıq, həmrəyliyə əsaslanan münasibətlərin daha da inkişaf etdirilməsinin vacibliyini vurğulayıblar.

Görüş zamanı, həmçinin Azərbaycan və Qazaxıstan arasında strateji tərəfdaşlıq münasibətlərinin müxtəlif aspektləri, nəqliyyat və enerji sahəsində əməkdaşlıq, o cümlədən regionda cari vəziyyət ətrafında fikir mübadiləsi aparılıb.

“Azərbaycanın Ermənistan Konstitusiyasının guya sülh müqaviləsinin imzalanmasına mane olması ilə bağlı iddiaları iki ölkə liderlərinin ən azı ilkin səviyyədə razılaşdığı prinsipləri təkzib edir”.

Ermənistan parlamentinin vitse-spikeri Ruben Rubinyan Antalyada keçirilən diplomatik forumun sessiyasında Azərbaycan Prezidentinin köməkçisi Hikmət Hacıyevə cavab verərkən belə deyib.

Qeyd edək ki, Hikmət Hacıyev öz çıxışında Azərbaycan tərəfinin Ermənistan Konstitusiyasının məzmununa aydınlıq gətirilməsini gözlədiyini bildirib.

“Ermənistanın Konstitusiyası və hüquqi bazası bizim daxili işimizdir. Bunun sülhə nail olmaq üçün gedən proseslərlə heç bir əlaqəsi yoxdur. Ermənistanın Azərbaycana qarşı heç bir ərazi iddiası yoxdur və bu, hətta Azərbaycan Prezidenti ilə Ermənistanın Baş nazirinin birgə bəyanatlarında dəfələrlə qeyd edilib.

Danışıqlar gedən sülh sazişi layihəsində ikitərəfli səviyyədə razılaşdırılmış ən azı ilkin iki məqam var. Birincisi, ağ-qara yazılıb ki, ölkələr bir-birinin ərazi bütövlüyünü tanıyır, bir-birinə qarşı ərazi iddiası yoxdur və gələcəkdə də olmayacaq. İkincisi, ölkələr bu sazişə əməl etməməkdə öz daxili qanunvericiliklərinə istinad etməyəcəklər. Ərazi məsələlərində bir-birimizdən heç nə tələb etmədiyimizə və etməyəcəyimizə inandırmağın ən yaxşı yolu sülh müqaviləsi imzalamaqdır”,-Rubinyan belə deyib.

Qeyd edək ki, Rubinyanın açıqlaması Azərbaycan-Ermənistan sülh danışıqlarının siyasi və hüquqi mahiyyətinə ziddir. Çünki Ermənistanın Azərbaycana qarşı ərazi iddialarının olmadığına dair Paşinyan hakimiyyətinin verdiyi bəyanatlar şifahi xarakter daşıyır. Ermənistanın ali hakimiyyət orqanlarının Azərbaycana qarşı ərazi iddialarını qadağan edən hər hansı rəsmi qərarı yoxdur.

Üstəlik, iki ölkə arasında sülh müqaviləsi imzalanmadığına görə Ermənistan Azərbaycan qarşısında ərazi iddialarının qarşısını alan siyasi və hüquqi öhdəliyə də malik deyil. Bu baxımdan, Rubinyanın söylədiyi fikirlər sadəcə, şifahi məzmun daşıyır və hüquqi qeyri-müəyyənlik yaradır.

Reallıqda isə Ermənistanın konstitusiyası və digər hüquqi-normativ aktları həm Azərbaycana, həm də Türkiyəyə qarşı ərazi iddialarını nəzərdə tutur. Ermənistan Ali Sovetinin və keçmiş Dağlıq Qarabağ Muxtar Vilayətinin Milli Şurasının Dağlıq Qarabağın Ermənistana birləşdirilməsi barədə 1989-cu il 1 dekabr tarixli qanunsuz qərarı Ermənistanın Müstəqllik Bəyannaməsinin 11-ci bəndində yer alıb. Hazırda Ermənistan konstitusiyasının preambula hissəsində həmin bəyannaməyə istinad edilir. Yəni Ermənistanın ali qanunu Azərbaycana qarşı ərazi iddiasını nəzərdə tutur. Ona görə də Ermənistan konstitusiyası artıq bu ölkənin daxili məsələsi olmaqdan kənara çıxaraq regional sülhə və sabitliyə təhlükə yaradan problemə çevrilib.

Ermənistan Azərbaycan və Türkiyə ilə münasibətləri normallaşdırmaq üçün ilk növbədə, Müstəqillik Bəyannaməsinə istinad hissəsini konstitusiyanın mətnindən çıxartmalıdır. Ermənistanın konstitusiya islahatından yayınması Azərbaycanla sülh sazişinin imzalanmasını qeyri-mümkün edir. Bu isə Ermənistanın özünü təcrid vəziyyətində saxlaması deməkdir. Lakin Ermənistanın Azərbaycana qarşı ərazi iddiaları yalnız Müstəqillik Bəyannaməsi və Konstitusiyanın preambula hissəsi ilə yekunlaşmır.

Konstitusiyanın 47.8-ci maddəsində qeyd edilir ki, Ermənistan Respublikasından kənarda yaşayan ermənilər Ermənistan Respublikasının müdafiəsindədir. Bu maddə 1995-ci ildə Ermənistanın Azərbaycana qarşı işğalına hüquqi əsas yaratmaq üçün konstitusiya mətninə daxil edilib. Halbuki, Azərbaycanda yaşayan bütün milli azlıqların, o cümlədən erməni vətəndaşların müdafiəsi və təhlükəsizliyi məhz Azərbaycan Konstitusiyası ilə təmin edilir. Ona görə də Ermənistan həmin maddəyə düzəliş etməlidir.

Bundan başqa, Ermənistanın Hərbi Doktrinası və Milli Təhlükəsizlik Strategiyasının xeyli hissəsi Azərbaycana qarşı ərazi iddialarından ibarətdir. Hərbi Doktrinada qeyd edilir ki, Ermənistan Respublikası “Dağlıq Qarabağ Respublikası xalqı”nın təhlükəsizliyinin təminatçısıdır və onun seçdiyi inkişaf yolunu təmin edir. Yəni Ermənistanın işğalçılıq siyasəti qanunvericilik səviyyəsində rəsmiləşdirilib və bu, mürtəce arqumentlərlə əsaslandırılıb. Məsələn, Hərbi Doktrinada Ermənistanın Qarabağı və digər əraziləri işğal etməsini əsaslandıran belə ifadələr yer alıb:

- müasir Azərbaycan ərazisində “soyqırım” yaşamış erməni xalqının yeni “etnik təmizləmə”lərinin təzahürünün reallıqları (1980-90-cı illərdə Sumqayıtda, Bakıda və başqa yerlərdə);

- 1988-1994-cü illərdə Dağlıq Qarabağ “xalqı”nın qanuni və sülh yolu ilə öz müqəddəratını təyin etmək istəklərinə qarşı Azərbaycan Respublikasının hərbi gücdən istifadə etmək və onları məcburi müharibəyə cəlb etmək siyasəti;

- daimi “fiziki məhv” təhlükəsi ilə üzləşən Dağlıq Qarabağ əhalisinin təhlükəsizliyinin təmin edilməsi zərurəti. Azərbaycan Respublikasının Dağlıq Qarabağ münaqişəsini güc yolu ilə həll etmək istəyi;

- Ermənistan Respublikasının və “Dağlıq Qarabağ Respublikası”nın və onların əhalisinin tarixi-ərazi, mənəvi-dini, etnik və mədəni kimliyi;

- Dağlıq Qarabağ “xalqı”nın öz tarixi vətənində öz müqəddəratını təyinetmə faktının mübahisəsiz siyasi və hüquqi əsasları;

- “Dağlıq Qarabağ Respublikası”nın demokratik, sosial, hüquqi dövlət kimi formalaşması reallığının dönməzliyi;

- Ermənistan Respublikası və “Dağlıq Qarabağ Respublikası”nın təhlükəsizliyini təmin etmək vəzifələrinin qarşılıqlı əlaqəsi və ümumi qəbul edilməsi.

Göründüyü kimi, Ermənistanın Hərbi Doktrinası Azərbaycana qarşı ərazi iddiasını nəzərdə tutmaqla yanaşı, ölkəmizdə separatçılığı dəstəkləməyə yönəlmiş və birbaşa müharibəyə səbəb ola biləcək sənəddir. Bu halda, hər hansı sülhdən danışmaq mümkün deyil.
Yaxud Ermənistanın Milli Təhlükəsilik Strategiyasında Azərbaycanın Ermənistana və “Dağlıq Qarabağ Respublikası”na qarşı silahlı qüvvədən istifadə ilə bağlı açıq tədhdidlərin səsləndirildiyi qeyd edilir.

Ermənistanın Milli Təhlükəsilik Strategiyasının “Dağlıq Qarabağ Respublikası” adlı 3-cü hissəsi xüsusilə diqqəti cəlb edir. Orada qeyd edilir:

“Hər hansı yekun razılaşmanın və ya yekun sənədin Qarabağ tərəfinin də razılığını alması prinsipindən daima çıxış edərək Ermənistan yalnız “Dağlıq Qarabağ Respublikası”nın faktiki mövcudluğunun dönməz reallığını möhkəmləndirməyə yönələcək həll variantlarını məqbul hesab edir. “Dağlıq Qarabağ”ın Ermənistanla ərazi əlaqələri olmalıdır. Təhlükəsizliyə zəmanət verilməlidir”.

Ermənistanın Milli Təhlükəsilik Strategiyası da Azərbaycanda separatçılığın dəstəklənməsi və ərazi iddialarını özündə əks etdirir.
Həmiçinin, Ermənistan Ali Sovetinin 1992-ci il iyul ayının 8-də qəbul etdiyi qərarda qeyd edilir:

““Dağlıq Qarabağ Respublikası”nı Azərbaycan Respublikasının tərkib hissəsi kimi tanıyan istənilən beynəlxalq və daxili sənəd Ermənistan Respublikası üçün qəbuledilməzdir”.

Bu qərar hələ qüvvədə qalır və Azərbaycana qarşı ərazi iddialarına hüquqi əsas yaradır.

Ona görə də Ruben Rubinyanın dedikləri reallığa ziddir. Ermənistan konstitusiyasını və digər qanunvericilik bazasını yeniləməyənə qədər ərazi iddialarının ortadan qalxmasından danışmaq mümkün deyil. Vyana Konvensiyasının 27-ci maddəsinə görə, Ermənistan beynəlxalq müqavilənin yerinə yetirməməsi üçün öz daxili qanunvericiliyinə istinad edə bilməz. Bunu Nikol Paşinyan da deyir. Amma Ermənistanın konstitusiyasında və qanunvericiliyində həm Azərbaycana, həm də Türkiyəyə qarşı ərazi iddialarının qalması perspektiv üçün təhlükədir.

Çünki Ermənistanda perspektivdə hakimiyyətə gələcək başqa bir siyasi qüvvə həmin hüquqi bazaya istinad edərək, sülh sazişinin imzalanmasından və ya müqavilə üzrə öhdəliklərin icrasından yayınaraq Azərbaycana ərazi iddiası irəli sürə bilər. Bu səbəbdən Ermənistan konstitusiyasının preambula hissəsi ilə yanaşı, 47.8-ci maddəsinə, Türkiyəyə ərazi iddiası təsvir edilmiş dövlət gerbi haqqında 21-ci maddəsinə, Ermənistanın Dövlət Gerbi haqqında qanunu və digər hüquqi-normativ sənədlərə yenidən baxmalıdır.

Finlandiyanın yeni prezidenti Aleksandr Stubb vəzifəsinin icrasına başlayıb.

Qeyd olunur ki, Stubbun andiçmə mərasimi Finlandiya televiziyası ilə canlı yayımlanıb. Yeni prezident ölkə parlamentində təntənəli nitq söyləyib.

Xatırladaq ki, Finlandiya prezidenti altı il müddətinə seçilir. Sauli Niinistö ardıcıl olaraq maksimum mümkün olan iki müddət ərzində dövlət başçısı vəzifəsində işləyib.
Mənbə: gazeta.ru

Ermənistan Xarici İşlər Nazirliyinin xüsusi tapşırıqlar üzrə səfiri Edmon Marukyan istefa verib.

Bu barədə o sosial şəbəkə hesabında paylaşım edib.

Bildirilib ki, o istefa ərizəsini təqdim edib.

“Son zamanlar bir sıra fundamental məsələlərdə yaranan fərqlər mənim xarici siyasət cəbhəsində iştirakımı mümkünsüz edir”, deyə o bildirib.

Bakı Avropa Şurası Parlament Assambleyasının alman deputatların təşəbbüsü ilə Azərbaycan nümayəndə heyətini səs hüququndan məhrum etməsinə qəzəblənib. Bu qərar alman deputat, kansler Şoltsun partiyasının üzvünün təşəbbüsü ilə qəbul edilib.

Bu barədə dövlət başçısı İlham Əliyev çərşənbə günü bir qrup alman biznesmeni qəbul edərkən bildirib.

“Bu, ikili standart deyilmi, yoxsa bizimlə aparılan bir oyundur?! Almaniya Kansleri qərəzsizlik nümayiş etdirir, onun bəyanatları və fəaliyyəti bunu əks etdirir. Onun rəhbərlik etdiyi partiyanın üzvü isə AŞPA-da 2 qeyri-xristian ölkəsindən biri olan Azərbaycanı uzaqlaşdırmaq istəyir və bunu nümayişkaranə və məqsədyönlü şəkildə edir”, deyə Əliyev qəzəbini bildirib.

“Biz bu qurumun sessiyalarında iştirak etməmək qərarına gəlmişik. Çünki əgər bizim öz mövqeyimizi bildirmək hüququmuz yoxdursa, nəyə görə orada olmalıyıq?! Əgər bir il ərzində nümayəndə heyətimizin hüquqları bərpa olunmazsa, biz Avropa Şurasından tamamilə çıxmağımız barədə məsələyə ciddi şəkildə baxa bilərik”, deyə Əliyev qeyd edib.

Daha sonra o, Almaniya KİV-lərində Azzərbaycanın guya azadlıqların təmin olunmadığı, insanların öz fikirlərinə görə həbs olunduğu, diktaturanın hökm sürdüyü despotik bir ölkə kimi təqdim olunmasına qəzəblənib.

“Bu, tamamilə yalandır”, deyən Əliyev Azərbaycanda işləyən Almaniya səfirinin Azərbaycandakı proseslərin şahidi olduğunu qeyd edib.

Daha sonra o, Qərbi Azərbaycan hərbi yolla öz torpaqlarını azad etdikdə Bakıya təzyiq göstərilməsində ittiham edib. Bu zaman o, Fransa və ABŞ-ın adını çəkib.

“Düşünürəm ki, Rusiya indi nəyin baş verdiyini yaxşı anlayır və yeni reallıqları qəbul edir. ABŞ və Fransa da eyni cür hərəkət etməlidirlər. Əks təqdirdə, vəziyyət onların planlaşdırdığı kimi olmayacaq”, deyə Əliyev bildirib.