Biləcəri qəsəbəsi - Bakı Beynəlxalq Avtovağzalı istiqamətində fəaliyyət göstərən 91 nömrəli avtobus xəttinin bəzi sürücüləri hər gün səhər və axşam bu avtobusdan istifadə edən sərnişinlərə əsəb, stress, hətta həyati təhlükə yaşadırlar. Nəqliyyat vasitəsinin tutumu az, ödəniş sistemi nağd və öz müdiriyyətinin təyin etdiyi yetərsiz qrafik üzrə hərəkəti özü ilə ciddi problemlər gətirir.
Belə ki, sürücü nəqliyyat vasitəsini ürəyinin istədiyi şəkildə idarə edir; digər avtobuslarla ötüşür, dar küçələrdə sürəti artırır, "yavaş sür" deyən kişi, qadın, uşaq, böyük - fərq etmir, hamısına sürücü kimi yox, "lotu" kimi cavab verir. Verilən cavablardan biri də "filan yerdə saxlamayacağam, kim düşəcəksə, burda düşsün!" və ya "mən nə edim, qrafik belədir, tələsirəm, tez düşün!" "Yaxşı edirəm, belədir!", "İstəmirsənsə, düş, get!" kimi cavablar verilir. Hətta bəzi sərnişinlərə qarşı "səninlə sonuncu dayanacaqda söhbət edərik!" kimi təhdidkar ritorikalardan istifadə edilir. Avtobusun içində müşahidə kameraları olmasına rəğmən, sürücü ona məhəl qoymur: telefonla danışır, siqaret çəkir, bağırır, sərnişinlərə kobud şəkildə "hərbi komanda"lar verir, dar küçələrdə qazın "belinə oturub", bir də ürəyi istəyən yerdə saxlayır.

91 nömrəli avtobusdan istifadə edənlər, bu halla çox yaxından tanışdırlar. Biləcəri sakinləri 91 nömrəli avtobusun bəzi sürücülərinə "yavaş sür" deməyə çəkinir. Sürücü sərnişinin üzərinə dartınır, hətta hərəkət zamanı başını döndərib, insanlarla "razborka"ya girir, "söhbət çürüdür". Dərd odur ki, dəfələrlə tutulan iradlara, şikayətlərə rəğmən, həmin "lotu sürücü"lər yenə eyni avtobus xəttində və eyni ritorika ilə fəaliyyətinə davam edir.

Qeyd olunan avtobus xətti və onun "ağa nəzərəm, belə gəzərəm!" təfəkkürlü sürücülərinin əməlləri ilə əlaqədar Azərbaycan Yerüstü Nəqliyyat Agentliyindən (AYNA) Bizimyol.info xəbər portalına bildirilib ki, bu istiqamətdə araşdırma aparılıb, tədbir görüləcək.

Mərkəzdən uzaq və qəsəbədaxili fəaliyyət göstərən bu növ avtobuslar nə üçün hələ də kart sisteminə keçid etmir? Sürücülərin sərnişinlərə qarşı belə aqressiya göstərməsinə səbəb nədir? Vaxt qrafiki niyə çarəsiz xəstəliyə çevrilib? Hər "yoldan keçən"i işə götürüb, günlük yüzlərlə vətəndaşın həyatı bir anda onlara necə əmanət edilir?

Bizimyol.info yaranmış biabrçı vəziyyətin əsas səbəbləri və onun məntiqli həll yolları istiqamətində nəqliyyat üzrə mütəxəssis Rauf Ağamirzəyevlə söhbətləşib.

"Azərbaycanda ilk kartla ödəniş sistemi 2015-ci ildən "BakuBus" avtobuslarından başlayıb və daha sonra şəbəkə genişlənib. İndi 2007 avtobusdan təqribən, 300-də kart sistemi yoxdur. Bəzi avtobuslarda bu sistemi quraşdırmaq fiziki olaraq mümkünsüzdür, onlar xətdən çıxarılmalıdır. Bu il ərzində yüz elektrobus şəbəkəyə qoşulacaq. O zaman həmin məsələ də öz həllini tapmış olacaq.

Digər məsələ ondan ibarətdir ki, daşıyıcıların biznes modeli köhnədir. Ötən il verilən önəmli qərarlardan biri, lisenziya müddətinin hüquqi və fiziki şəxslər bir ildən yeddi ilədək uzadılması idi. Yəni əvvəl bir lisenziya ilə bir il fəaliyyət göstərə bilirdinizsə, indi yeddi il fəaliyyət göstərə bilərsiniz. Bu, önəmli bir qərardır və onun davam olaraq da bugünədək çalışılmış plan sistemi dəyişilərək, "Brutto" müqavilə"lərə keçilməlidir. Brutto müqavilə odur ki, hər km-ə görə dövlət subsidiya edir. Həmin subsidiyalardan sonra daha sərt tələblər olacaq. Həmçinin bilirik ki, ölkəmizdə ciddi sürücü qıtlığı var. Bunun bir səbəbi də əməkhaqqının az, sahənin isə olmasıdır. Bunun aradan qaldırılması üçün brutto xərc müqavilələrinə keçilməlidir. Beləliklə, sürücülərin əməkhaqqı artırıldıqdan sonra bu sahəyə maraq da artacaq.

Stresi azaldan səbəblərdən biri də ayrılmış avtobus zolağı şəbəkəsidir. Avtobus sürücüsünün öz yolu olduqdan sonra bu sahəyə sürücülərin meyli də artacaq. Hətta düşünürəm, bu istiqamətdə qadın sürücüləri də cəlb etmək lazımdır. Beləliklə, ümumi olaraq, həm gender bərabərliyi və ictimai nəqliyyatın keyfiyyətinə təsir edən amillərdən biri olar.

Bu məsələlər sistemli və mərhələli şəkildə icra olunmalı, amma dayanmamalıdır. Burada yarımçıqlığa yol verilməməlidir. Bir qərar verilirsə, onun ardınca bununla əlaqəli olan digər qərarlar da verilməlidir. Nəticə olaraq, ictimai nəqliyyatın keyfiyyətli olması üçün bu sahəyə pul ayrılmalıdır. Həmin vəsait sahibkar və ya dövlət tərəfindən də ayrıla bilər. Beləliklə, keyfiyyət artacaq və bu da həmin sahəyə olan meylliliyi gücləndirəcək.

Həmçinin, bununla əlaqəli olan məsələlər - tutalım, hər bir avtobus dayanacağa gəlirsə, səkinin, dayanacağın, özünün vəziyyəti, avtobusun harada yerləşməsini göstərən tətbiqdəki inteqrasiya məsələləri də öz həllini tapacaq.

Qeyd olunan aqressiyanın kökü nədən qaynaqlanır? İnsanlar bir plan qurur və artıq o plana yetişməyəndə, hirslənirlər. Sürücü nəzərdə tutulmuş qrafik üzrə hərəkət edə bilmədikdə danlanırsa, o da aqressiyaya səbəb olur. Bu səbəblərin aradan qaldırılması yönündə qərarlar verilməli və icrası təmin olunmalıdır" - deyə, nəqliyyat üzrə ekspert əlavə edib.

Mətin Şükürlü, Bizimyol.info

Və ya Sahil Babayev hansı səbəblərdən özünün kütləvi reklamına ehtiyac hiss edib?

Bu ayın əvvəlində Əmək və Əhalinin Sosial Müdafiəsi Nazirliyinin yeni layihəsi - DOST TV – internet televiziyasının fəaliyyətə başlaması barədə məlumat verildi. Məlumatda deyildi ki, Əmək və Əhalinin Sosial Müdafiəsi Nazirliyinin internet resursu olan DOST TV-də əsasən əmək, məşğulluq, sosial müdafiə və sosial təminat mövzuları əhatə olunacaq, sosial yeniliklər, islahatlar, sosial hüquqlar və s. barədə məlumatlar çatdırılacaq. Sosial məsələlərlə bağlı suallar da nazirlik rəsmilərinin iştirakı ilə birbaşa cavablandırılacaq.

Təbii ki, əhalinin maarifləndirilməsi və xeyli sayda jurnalist həmkarımızın işlə təmin olunması baxımından müsbət layihə kimi qəbul oluna bilər. Ancaq o halda ki, söhbət normal, effektiv, şəffaf və necə deyərlər, “əhaliyə canı yanan” bir nazirlikdən gedərsə (əgər ümumiyyətlə, Azərbaycanda belə birisi varsa-C.M.). Yəni, necə deyərlər, “avazın yaxşı gəlir, oxuduğun Quran olsa”...

Təəssüf ki, indiyə qədərki mənzərə göz önünə alınanda, nədənsə yeni televiziya layihəsinin əhalidən çox nazirliyin və nazirin maraqlarına, piarına xidmət edəcəyinə dair şübhələr yaranır. Ümumiyyətlə, son zamanlar sözügedən nazirliyin və şəxsən nazir Sahil Babayevin mətbuatda reklamı xeyli artıb. Xüsusilə də ölkənin ən tanınan rusdilli saytlarından biri mütəmadi olaraq, az qala hər gün nazirliyin bu və ya digər tədbirləri, xüsusilə də S.Babayevin fəaliyyəti, görüşləri, səfərləri barədə məlumatlar yayır. Adətən bu məlumatlar müsbət mesajlar və təriflərlə “bəzədilir”. Hansı ki, əvvəllər nə sözügedən nazirlik, nə də nazirlə bağlı bu tendensiya müşahidə olunmurdu.

S.Babayevin hazırda hansı səbəblərdən bu cür reklama ehtiyacının yarandığını demək çətindir. Bu, onun hakimiyyət daxilindəki mövqeyinin, vəzifəsinin itirilməsi təhlükəsindən tutmuş daha yüksək posta iddialara qədər müxtəlif səbəblərlə bağlı ola bilər. Ümumiyyətlə, indiki hökumətdə özünü reklam etdirmək istəyən nazirlər və digər yüksək vəzifəlilər az deyil, amma indiyə qədər bunun üçün televiziya yaradanına rast gəlməmişik...

Lakin bizi düşündürən daha çox nazirin şəxsi karyera məsələləri yox, belə bir televiziyanın – bahalı bir layihənin, bu nazirliyin nəyinə, harasına yaraşmasıdır. Söhbət əhalinin sosial təminat sarıdan zəif, kasıb təbəqəsinin, əlillərin, qazilərin və s. ən çox şikayət etdiyi, fəaliyyətindən narazı qaldığı nazirlikdən gedir.

Maraqlıdır ki, bu nazirlik və onun obyektləri, şirkətləri və s. olan yüksək gəlirli vəzifə sahibləri yaşa görə 220 manat müavinət, 240 manat pensiya alan vətəndaşa həmin televiziyadan nəyi və hansı üzlə deyəcək, izah edəcək? Öz missiyasının, vəzifəsinin fəlsəfəsini anlamayan, anlamaq istəməyən, ona görə də dövlətin əhalinin kasıb təbəqəsinə, əlillərə, pensiyaçılara verdiyi vəsaitin artırılması yox, kəsilməsi, “qənaət edilməsi” ilə fəxr edən bir nazirliyin və onun başında duran şəxsin bu “qara camaata” xitab etməyə sözü və buna mənəvi haqqı varmı?

Bəlkə xırda və mənasız bəhanələrlə süründürməçiliyə məruz qoyulan, nəticədə əlillik müavinəti aylarla, illərlə, ya da birdəfəlik kəsilən əlil vətəndaşa deyəcək nələrisə var?

Bəlkə kənd camaatına min əzab-zillətdən, süründürməçilikdən və “qara-qura” alış-verişdən sonra verdikləri sınıq-salxaq mal-qaranı, qoyun-quzunu göstərəcəklər?

Görəsən, “uşaq pulu”nun verilməsinin ən qızğın əleyhdarlarından olan nazir Babayev kirayələrdə yaşayan, fəhləlik edib övladına od bahasına uşaq yeməyi alan və kasbçılıq ucbatından ailəsi hər an dağılmaq təhlükəsilə üz-üzə qalan azərbaycanlı gəncə özünün və hökumətin “uşaq pulu inadkarlığını” necə izah edəcək həmin televiziyadan?

Yeri gəlmişkən, S.Babayev “uşaq pulu” verilməməsini onunla izah etmişdi ki, “ölkədə demoqrafik vəziyyət yaxşıdır və əhalinin artımının stimullaşdırılmasına ehtiyac yoxdur”. Yəni, əhaliyə hər uşağa görə 100 manat versələr, millət artıb-törəyə bilər, bu isə nazirin dediyinə görə, dövlətə, hökumətə lazım deyil. Doğrudanmı belədir?

Axı, heç bir dövlət, o cümlədən Azərbaycan dövləti bu cür düşünə bilməz və sözsüz ki, düşünmür də! Belə olan halda, millətə, xalqa qarşı belə bir aşağılayıcı zehniyyətin, düşüncənin sahibinin indiyə qədər nazir postunda qalmasının özü bir möcüzədir və yəqin ki, nazir Babayev yaratdığı yeni televiziyada bu möcüzənin də sirrini açıqlayacaq...

Yeri gəlmişkən, son statistikaya görə, Azərbaycanda kişilərin 48 faizi pensiya yaşına çatmamış dünyasını dəyişir. Ancaq yəqin ki, bu statistika Azərbaycandakı demoqrafik durumla bağlı "özünəməxsus mövqeyi" olan nazir Babayevi qətiyyən kədərləndirmir...

Cəlal Məmmədov

“AzPolitika.info”

“AzəriMed” QSC İnzibati Xətalar Məcəlləsinin gömrül qaydaları əlehyinə olan maddəsini pozub. Tribunainfo.az xəbər verir ki, QSC İXN-nin 485.2-ci maddəsini pozduğuna görə cərimələnəcək. Belə ki, Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə vəzifəli şəxslər min manat məbləğində, hüquqi şəxslər min beş yüz manat məbləğində cərimə edilir. “AzəriMed”in işinə 30 aprel tarixində Nərimanov Rayon Məhkəməsində hakim Vüsal Qurbanovun sədrliyi ilə baxılacaq. Bu şirkətin deputat Kamaləddin Qafarova aid olduğu bildirilir. K.Qafarov bir sıra firmalara sahibdir.

“Azeri Med” QSC-nin Kəmaləddin Qafarova məxsus olduğunu təsdiq edən başqa fakt da var. Bu şirkətin hüquqi ünvanı Bakı şəhəri Binəqədi rayonu, Atatürk prospekti, ev 65A, məhəllə 3078A, mənzil 155-də yerləşib. Bu ünvanda Kəmaləddin Qafarov və ailə üzvləri də qeydiyyatdadır. 6 noyabr 2020-ci ildə şirkətin reyestr sənədlərinə dəyişiklik edilib. Görünür, həmin vaxt ünvan da dəyişdirilib.

Dəyişikliyin 2020-ci ildə edilməsi təsadüfi deyil. Bu dəyişikliyə qədər növbədənkənar parlament seçkiləri keçirilib və Kəmaləddin Qafarov deputat mandatı qazanıb. Deputat olduqdan sonra onun sahibi olduğu şirkətlər, o cümlədən “Azeri Med” QSC diqqət mərkəzinə gəlib. QSC-nin 2020-ci ildə qalib gəldiyi tenderlərlə bağlı araşdırma yazılarında şirkətin Kəmaləddin Qafarova məxsus olması həm də yuxarıda qeyd etdiyimiz hüquqi ünvanla əsaslandırılıb. Bu da deputatı şirkətin hüquqi ünvanını dəyişməyə məcbur edə bilər. Çünki qanunvericilikdə deputatın biznes fəaliyyətilə məşğul olması yasaqdır.

Mediada yayılan məlumatlara görə, “Kanon” MMC, “Mega Pharmacy” MMC, “Azeri Med MNK” MMC, “Versal” MMC, “Versal Palace” MMC və “Naturalist” şirkətləri də Kəmaləddin Qafarovun idarəçiliyindədir O, əvvəl MOM baş direktorunun müavini olub. Parlament üzvü olduqdan sonra da biznes əlaqələri inkişaf edib. Qarşı tərəfin də mövqeyini işıqlandırmağa hazırıq.

Mediada Türkiyənin Kayseri şəhərindəki Azərbaycan Qardaşlıq Parkında Şuşa Azərbaycan Evinin açılış mərasimi keçirilməsi ilə bağlı xəbərlərə rast gəldik. Məlumatda bildirilirdi ki, tədbirdə Diasporla İş üzrə Dövlət Komitəsinin sədri Fuad Muradov, Azərbaycan Prezidentinin Şuşa şəhəri üzrə xüsusi nümayəndəsi Aydın Kərimov, Kayseri Böyükşəhər Bələdiyyə başqanı, Talas Bələdiyyə başqanı, Türkiyə parlamentinin Kayseridən olan millət vəkilləri, yerli ictimaiyyətin nümayəndələri, bu şəhərdə yaşayan və təhsil alan soydaşlarımız iştirak ediblər.

Tədbirdə Kayseri Böyükşəhər Bələdiyyəsinin başqanı Memduh Büyükkılıç qeyd edib ki, Azərbaycan Evinin açılışı iki ölkənin prezidentləri Rəcəb Tayyib Ərdoğan və İlham Əliyevin uzaqgörən siyasətinin, “bir millət, iki dövlət, tək yumruq” olmağın nəticəsidir.

Mətləbə keçməzdən əvvəl vurğulayaq ki, Əliyev-Ərdoğan siyasi müttəfiqliyini kiçik bir muzeyin açılışı səviyyəsinə endirməyin özü siyasi səbatsızlıq və naşılıqdır - adı nə olursa, olsun, hətta simvolik ifadə olaraq işlənsə belə...

Əlbəttə, fikrimiz həmin tədbirdə edilən çıxışları təftiş və tənqid etmək deyil. Nədən ki, türkiyəli qardaşlarımızın oradakı iştirakının və söylədiklərinin səmimiyyətinə zərrə qədər şübhə etmirik.

Diqqətimizi çəkən Diasporla İş üzrə Dövlət Komitəsinin xeyir-duası və bəlkə də maliyyə dəstəyi (bu barədə açıq mənbələrdə hər hansı bir məlumat qeyd edilməyib) ilə mədəniyyət ocağının yaradılmasıdır. Belə təsisatlar adətən ölkəmizin haqlı mövqeyinin, tariximizin, mədəni irsimizin təbliği, Azərbaycan mədəniyyətinin, tarixinin təbliğatı məqsədilə yaradılır. Bu təşkilatlar – Azərbaycan Evləri Prezident İlham Əliyevin göstərişinə əsasən yaradılır və qeyd olunan missiyanın həyata keçirilməsində müstəsna rol oynaya bilər. Azərbaycan evlərinin düzgün təşkili və idarə edilməsi dövlətimizin və xalqımızın əleyhinə qara PR kampaniyalarının aparıldığı bir vaxtda haqlı mövqeyimizin müdafiəsi, haqq səsimizin müfaviq ünvanlara çatdırılması və təbliği işinə də önəmli töhfələr verə bilər.

Əlbəttə, bu evlərin öz işlərinin öhdəsindən necə və hansı səviyyədə gəldiyini, necə fəaliyyət göstərmələrini bir kənara qoyuruq. Növbəti yazılarımızda həmin evlərin fəaliyyəti barədə materiallar hazırlayıb təqdim edəcəyik. İndi isə vurğulamaq istədiyimiz məsələ bu cür evlərin qardaş ölkədə və ya ölkələrdə təşkil edilməsi ilə bağlıdır...

Əvvəla, ondan başlayaq ki, Ümummilli Lider Heydər Əliyev demişkən, “Azərbaycan və Türkiyə bir millət, iki dövlətdir” və Türkiyə cəmiyyətində Azərbaycana qarşı xüsusi sevgi və rəğbət var.

İkincisi, Türkiyədə Azərbaycan adına fəaliyyət göstərən, Azərbaycana çox doğma münasibət bəsləyən saysız-hesabsız qeyri-hökumət təşkilatları, siyasi xadimlər, dini icmalar, partiyalar var. Həmin subyektlər ölkəmizə və xalqımıza təbii sevgidən doğan istəklə təmənnasız xidmət göstərirlər.

Bundan başqa, Prezident Administrasiyasının müvafiq şöbəsi, diplomatik korpusumuzun, SOCAR-ın, elə Diasporla İş üzrə Dövlət Komitəsinin özünün himayə etdiyi və işlədiyi bir çox siyasi, ictimai və mədəni yönümlü subyektlər var ki, Azərbaycan barədə faydalı layihələr icra edirlər.

Bizimlə razılaşmayanlar iddia edə bilərlər ki, Türkiyə nə qədər qardaş dövlət olsa da, oradakı erməni icmaları müəyyən gücə malikdir və davamlı olaraq ölkəmiz əleyhinə lobbist fəaliyyəti göstərirlər. Bunları nəzərə alaraq arxayınlaşmaq düzgün deyil. Biz də arxayınlaşmanı düzgün saymırıq, əksinə mövcud təşkilatların fəaliyyətinin davam etdirməsini tövsiyə edirik. Lakin bu qədər təşkilatın fəaliyyəti fonunda Türkiyədə “Azərbaycanın tanıdılması, yaxud təbliği” adına yeni diaspor təşkilatlarının, mədəniyyət mərkəzlərinin açılışına ehtiyac varmı?

Qeyd etdiyimiz kimi, Türkiyədə onsuz da bu məqsədlə yaradılan və ciddi fəaliyyət göstərən təşkilatlar və mərkəzlər var. Belə olan təqdirdə, hər il Türkiyədə diaspor işi ilə bağlı külli miqdarda büdcə vəsatinin xərclənməsi məntiqlidirmi?


Türkiyədəki diaspor adı altında xərclənən həmin vəsaitləri, istifadə olunan enerjini naqis qonşularımızın və onların havadarlarının əleyhimizə haqsız təbliğat apardığı Qərb cəmiyyətlərində diaspor və lobbi fəaliyyətinin gücləndirilməsinə yönəltmək daha düzgün və faydalı olmazmı?

Komitə Türkiyədə yeni təşkilatlar açınca, həmin Azərbaycan Evlərini Qərb cəmiyyətlərində təşkil etsə, qapısı bağlı qalmış diaspor dərnəklərini canlandırsa, daha yaxşı olar.

Əziz dostlar və düşmən olmayanlar... Türkiyədə bu qədər Azərbaycan evinə nə hacət, Türkiyə bütövlükdə Azərbaycanın evi deyilmi?

Diaspora.TV-nin
Analitik Qrupu

Dövlət İmtaham Mərkəzi (DİM) tərəfindən keçirilən tender müsabiqəsinin qalibi “TAİS-İKF” MMC (VÖEN-1400019741) olub.
Yeniavaz.com xəbər verir ki, “TAİS-İKF” MMC DİM-in sifarişi ilə bu quruma yeməklərin hazırlanması xidməti göstərəcək və qarşılığnda 201 min 662 manat alacaq.
Məlumat üçün bildirək ki, “TAİS-İKF” MMC 30 iyun 1994-cü il tarixində dövlət qeydiyyatına alınıb. Nizamnamə kapitalı 10 manat olan MMC-nin hüquqi ünvanı Bakı şəhəri, Nərimanov rayonu, Ələsgər Qaibov, ev 5-də yerləşir. MMC-nin qanuni təmsilçisi Şirinov Rafail Məmməd oğludur.
Onu da bildirək ki, hazırda “TAİS-İKF” MMC-nin dövlət büdcəsinə vaxtında ödənilməyən 19 min 976 manat 70 qəpik vergi borcu var. “Dövlət satınalmaları haqqında” Qanunun 23-cü maddəsində göstərilir ki, vergilər və digər icbari ödənişlər üzrə vaxtı keçmiş öhdəlikləri olan şirkətlərin tender müsabiqəsində iştirakına yol verilmir.
DİM-in tender müsabiqəsiylə bağlı sənəd qəbulu bu ilin fevral ayında keçirib. “TAİS-İKF” MMC-nin fevral ayında vergi borcu olmayıbsa, o zaman 20 min manatlıq borc son bir ay ərzində yaranıb.
Qeyd edək ki, tenderin qalibi olan “TAİS-İKF” MMC-nin adı mətbuatda bir sıra qalmaqallarda hallanıb.
Ötən ilin aprel ayında Bakıda A.Hüseynzadə adına 20 nömrəli məktəb-liseydə kütləvi zəhərlənmə barədə məlumat yayılıb. Açıqlanan rəsmi məlumatlarda bildirilib ki, 20 nömrəli məktəb-liseyin bufetindən toyuq əti alan uşaqlarda qarın ağrısı əlamətləri müşahidə olunub. Hadisə ilə bağlı 12 aprel tarixində Azərbaycan Respublikası Qida Təhlükəsizliyi Agentliyi (AQTA) tərəfindən açıqlama verilib. Açıqlamada qeyd olunub ki, aprelin 6-da sözügedən məktəbin müxtəlif siniflərində təhsil alan 7 şagird məktəbin yeməkxanasında xidmət göstərən “TAİS İKF” MMC tərəfindən satışı həyata keçirilən toyuğun qızardılmış döş əti (nagets), 1 şagird isə dönər (şaurma) qəbul edib. Qeyd olunan hadisə ilə bağlı 20 nömrəli tam orta məktəbdə keçirilən yoxlama zamanı “TAİS İKF” MMC-nin yeməkxanada icarə müqaviləsi əsasında fəaliyyət göstərdiyi, adıçəkilən qidaların məktəbə həmin şirkət tərəfindən hazır şəkildə termobokslara yığılaraq gətirildiyi məlum olub.
“TAİS İKF” MMC ilə bağlı daha bir qalmaqallı hadisə 2022-ci ildə baş verib. Sevil Xanbabayeva adlı şəxs sosial şəbəkələrdə videomüraciət yayaraq bildirib ki, o “Bakı Metropoliteni” QSC-nin “Ulduz” stansiyasında xadimə kimi çalışır. Sevil Xanbabayeva iddia edib ki, metropolitenin işçiləri Rafail adlı şəxsin bağında qanunsuz işlədilir. Daha sonra məlum olub ki, “Bakı Metropoliten” QSC-nin təmizlik işləri ilə bağlı keçirdiyi tender müsabiqəsinin də qalibi “TAİS İKF” MMC olub.